Si pjesë e projektit evropian "Harmonizimi i Legjislacionit Farmaceutik Shqiptar me Direktivën Evropiane të Barnave" (PHARM-EU), i cili është pjesë e aksioneve të Modulit Jean Monnet, financuar nga programi Erasmus+ i BE-së, më 10 prill 2025 u mbajt konferenca “Provat Klinike dhe Aksesi në Barnat: Sfidat, Baza ligjore dhe Inovacioni”, me pjesëmarrjen e profesionistëve nga fusha.
Organizatorja shkencore e konferencës, Prof. Assoc. Malvina Hoxha, hapi punimet e konferencës duke theksuar vlerën thelbësore të provave klinike për shëndetin publik dhe promovimin e inovacionit terapeutik, duke nënvizuar gjithashtu sfidat rregullatore në shtetet jo anëtare të BE-së, si Shqipëria.
Dekani i Fakultetit të Farmacisë, Prof. Roberto Perrone, theksoi rolin thelbësor të farmacistëve në realizimin e provave klinike, jo vetëm si profesionistë të përfshirë në menaxhimin e barnave, por edhe si figura kyçe në komunikimin me pacientët dhe mbledhjen e të dhënave klinike.
Prof. Nunzio Denora paraqiti Studimin Klinik Pilot për një formulim të ri pediatrik për trajtimin e esofagitit eosinofil, një projekt inovativ, që thekson vëmendjen e madhe që duhet ti kushtet pacientëve pediatrikë.
Dr. Ermal Pashaj diskutoi rolin strategjik të universiteteve në zbatimin dhe mbështetjen operative të provave klinike, duke paraqitur përvojën e studimit klinik "TumoCure Gel", i aplikuar tek pacientët me karcinomë skuamoze të kokës dhe qafës në faza të avancuara.
Prof. Arben Boshnjaku paraqiti kuadrin aktual rregullator të provave klinike në Kosovë, duke theksuar rolin kryesor të komiteteve të etikës në mbrojtjen e pjesëmarrësve në provat klinike dhe ruajtjen e integritetit të kërkimit klinik.
Dr. Gjergj Priska ilustroi rolin e “Clinical Research Associate”, profesionistit përgjegjës për monitorimin e studimeve klinike, duke theksuar rëndësinë e trajnimeve të vazhdueshme dhe komunikimit efektiv mes sponsorizuesve, qëndrave klinike dhe autoriteteve rregullatore.
Në përfundim të punimeve të konferencës, koordinatorja shkencore e projektit, Prof. Assoc. Malvina Hoxha, theksoi rëndësinë e forcimit të kuadrit rregullator kombëtar, i cili është thelbësor për sigurimin e standardeve të larta të cilësisë në kërkimin klinik, duke rritur kështu sigurinë e trajtimeve dhe përparimin e vazhdueshëm të terapive farmakologjike.
