Me pankarta në duar, me hapa të vegjël dhe në heshtje solemne nderuam në një reflektim të dedikuar vajzat dhe gratë që kanë humbur jetën si pasojë e dhunës. Kampusi Universitar Spitalor “Zoja e Këshillit të Mirë” është jo vetëm hapësira e edukimit dhe profesionalizimit, por edhe hapësira e ndjeshmërisë qytetare dhe të angazhuar duke përcjellë mesazhe bashkimi dhe shprese. Studentë, profesorë, mjekë, drejtues të Spitalit Katolik dhe UKZKM përshkuan rruginat e kampusit në shenjë nderimi dhe kujtese duke ecur krah njëri-tjetrit me qëllim sensibilizimin e shoqërisë shqiptare kundër dhunës që tragjikisht ka marrë jetë të pafajshme. Të bekuar nga lutjet e Padre Paschal të Baritores së universitetit vajzat dhe djemtë e pranishëm lexuan emrat e viktimave që kanë humbur jetën, lexuan poezi të shkurtra dhe në fund inauguruan sëbashku Stolin e Kuq që do të jetë në kampus si simbol i qytetarëve që nuk heshtin, por e dënojnë dhunën në çdo formë të saj. Emrat e viktimave të shkruara ne letërza u ngjitën mbi dërrasat e Stolit të Kuq, pranë të cilit u vendosën edhe këpucët si simbol i 25 nëntorit ditës ndërkombëtare të Luftës kundër dhunës ndaj grave.
Jemi bashkë për të kujtuar, dhuna nuk luftohet me heshtje!
